MANILA, Philippines — Inaasahang magiging mabisang tugon sa P7.3 trilyong kakulangang pondong puhunan sa mga imprastraktura ng bansa ang naipasang panukala noong Disyembre 12 na ‘Public-Private Partnership (PPP) Act’.
Ayon kay ‘House Ways and Means chairman’ Joey Sarte Salceda (Albay, 2nd District), na pangunahing may-akda ng panukalang batas at ‘technical working group chair na sadyang kailangan ang PPP.
Layunin ng PPP Act (HB6527) na lumikha ng isang sistema kung saan mahusay at mabisang maisusulong ang pagtutulungan ng pribadong sektor at pamahalaan sa paggawa ng malalaki at mahahalagang mga imprastraktura at katulad nitong mga proyektong pangkaunlaran.
Sa ilalim ng panukala, malinaw na sinasabing ang PPP ay malayang kasunduan sa pagitan ng nakatalagang ahensiya ng gobiyerno at ng pribadong kumpanyang nagpapanukala tungkol sa pagpundo, pagdisenyo, paggawa, pangangasiwa at pangangalaga, o kumbinasyon ng mga naturan, kaugnay sa pangkaunlarang mga proyekto na karaniwang gubiyerno lamang ang nangangasiwa, at kung saan magkatulong ding tutugunan ng pamahalaan at kabalikat nitong mga pribadong kumpanya ang mga hamon ng proyekto.
Isa ang PPP Act sa mga prayoridad na dapat isabatas na ipinahayag ni Pangulong Marcos sa kanyang unang ‘State of the Nation Address.’